पुणे विद्यापीठ “इनोव्हेशन’मध्ये देशात आठवे

राष्ट्रीय स्तरावरील 2021चे "अटल' नवोपक्रमचे रॅंकिंग जाहीर

पुणे : केंद्रीय शिक्षण मंत्रालयाच्या “अटल’ या नवोपक्रम राष्ट्रीय क्रमवारीत (अटल रॅंकिंग ऑफ इन्स्टिट्युशन्स ऑन इनोव्हेशन आचिव्हमेंट) सावित्रीबाई फुले पुणे विद्यापीठाने देशात आठवे स्थान मिळवले आहे; तर राज्य पातळीवर पहिल्या स्थानावर आहे. विद्यापीठात नवोपक्रम केंद्राने केवळ अडीच वर्षांत राष्ट्रीय क्रमवारीत स्थान मिळवले आहे.

देशातील शैक्षणिक संस्था व विद्यापीठांमध्ये “नवोपक्रम व उद्योजकता विकास’ होण्याच्या दृष्टिकोनातून केंद्र सरकारच्या अधिपत्याखालील “ऑल इंडिया कौन्सिल फॉर टेक्‍निकल एज्युकेशन’तर्फे शिक्षणसंस्थांची नवोपक्रमातील उद्दीष्टपूर्ती या विषयक राष्ट्रीय क्रमवारी जाहीर केली जाते. 2021 या वर्षात देशातील 1 हजार 438 शिक्षणसंस्थांनी या क्रमवारीत सहभाग घेतला होता. त्यामध्ये आयआयटी, एनआयटी, आयआयएससी आदी संस्थांचाही समावेश आहे.

यामध्ये देशातील अभिमत व राज्य विद्यापीठांच्या पहिल्या दहा विद्यापीठांच्या यादीत सावित्रीबाई फुले पुणे विद्यापीठाने स्थान मिळवले आहे. केंद्रीय शिक्षण राज्यमंत्री डॉ. सुभाष सरकार यांनी बुधवारी ही क्रमवारी जाहीर केली. स्टार्टअप, नवोपक्रम, कृत्रिम बुद्दीमत्ता आदी विषयांशी संबंधित अनेक संस्थांसोबत विद्यापीठाने एकत्रित उपक्रम राबविले आहेत. अनेक छोट्या व मोठ्या कालावधीचे अभ्यासक्रमही सुरू केले. सातत्याने प्राध्यापकांना प्रशिक्षित केले. विद्यापीठात सात एक्‍सेलन्स सेंटर आहेत.