पोलीस हवालदार अजय दरेकर यांची निगडी-कन्याकुमारी सायकलवारी यशस्वीरीत्या पूर्ण

नऊ दिवसांत त्यांनी 91 तास 42 मिनिटे सायकलिंग करून 1600 किलोमीटर लांबीचा पल्ला पार केला

कामशेत :  भारताच्या 75 व्या स्वातंत्र्याचे औचित्य साधून, इंडो ऍथलेटिक सोसायटीचे 75 सदस्य पुणे ते कन्याकुमारी हे 1600 किमीचे मोठे अंतर कापण्यासाठी सायकलस्वारीचे आयोजन करण्यात आले. मोठ्या संख्येने सहभागी असलेली ही आपल्या देशातील एकमेव सर्वात लांब “राइड’ ठरली. कामशेत पोलीस ठाण्यातील पोलीस हवालदार अजय दरेकर यांनी वयाच्या 48 व्या वर्षी यशस्वीरित्या सायकलवारी पूर्ण केली.

स्वातंत्र्याचा अमृत महोत्सवाच्या निमित्ताने आयोजित करण्यात आलेल्या सशस्त्र दलाच्या लांब पल्ल्याच्या सायकलिंगसाठी प्रशिक्षण भागीदार म्हणून निवड झाल्याबद्दल अभिमान असल्याचे पोलीस हवालदार अजय दरेकर यांनी सांगितले.

दहा दिवसांच्या प्रवासात पुणे-कराड-बेळगाव-येल्लापूर-मुरुडेश्‍वर-मंगळूर-थलासेरी-गुरुवायूर-अलप्पुझा-तिरुवनंतपुरम-कन्याकुमारी अशी ठिकाणे समाविष्ट होती. सर्व रायडर्स यांनी दररोज 9 ते 10 तास सायकल चालवून 170-180 किमी अंतर पार केले जात होते, असे नऊ दिवसांत त्यांनी 91 तास 42 मिनिटे सायकलिंग करून 1600 किलोमीटर लांबीचा पल्ला पार केला.