देहू नगरपंचायत निवडणुकीत चार प्रभागांमध्ये 12 उमेदवार रिंगणात

सहा उमेदवारांनी घेतली माघार

देहूगाव : देहू नगरपंचायत सार्वत्रिक निवडणूक 2021 च्या अनुषंगाने सुरू असलेल्या निवडणुकीतील उर्वरित चार प्रभागांमध्ये सुरू असलेल्या निवडणूक प्रक्रियेमध्ये सोमवारी  (दि. 10) अंतिम दिवशी दुपारी तीन वाजेपर्यंत माघार घेण्याची मुदत होती. सहा अपक्ष इच्छुक उमेदवारांनी माघार घेतल्याने तीन अपक्ष उमेदवारांसह 12 जण निवडणूक रिंगणात आहेत.

देहू नगरपंचायतीच्या सार्वत्रिक निवडणुकीतील उर्वरित चार प्रभागासाठी एकूण 24 जणांचे नामनिर्देशन पत्र दाखल झाले होते. छाननीमध्ये 4 जणांचे अर्ज अवैध ठरल्याने निवडणूक रिंगणामध्ये 18 उमेदवारांचा एकूण 20 नामनिर्देशन पत्र वैध झाले होते. सोमवारी अंतिम दिनी अनुक्रमे प्रभाग क्रमांक 11 – 1, 12 – 2, 14 – 1, तर 15 मधून – 2 असे सहा अपक्ष उमेदवारांनी माघार घेतल्याने 12 उमेदवार निवडणूक रिंगणात आहेत. यामध्ये राष्ट्रवादी कॉंग्रेसचे 4, भाजपाचे 4, शिवसेनेचे 1, तर अपक्ष 3 उमेदवार निवडणूक रिगणात आहेत.