झटपट न्याय : अवघ्या ३६ तासांत विनयभंगातील आरोपीला सहा .महिन्यांची शिक्षा

चिंचवड पोलिसांची कामगिरी : विनयभंगाच्या गुन्ह्यातील आरोपीला सहा महिन्यांचा कारावास

पिंपरी – उशिरा मिळालेला न्याय हा अन्यायासारखाच असतो. न्यायालयात वर्षानुवर्ष सुनावणी सुरूच राहते. त्यामुळे अनेकदा आरोपी निर्दोष सुटतात. आरोपींच्या मनातील कायद्याचा धाक कमी होतो. मात्र या सर्वाला छेद देणारी घटना चिंचवड येथे घडली. विनयभंगाचा गुन्हा दाखल झाल्यावर पोलिसांनी आरोपीला अटक करुन दोषारोपपत्रासह न्यायालयात हजर केले. न्यायालयानेही अवघ्या 36 तासांमध्ये आरोपीला सहा महिन्यांची शिक्षा सुनावली. एवढ्या झटपट पद्धतीने न्याय मिळण्याची शहरातील ही पहिलीच घटना आहे. पोलीस आणि न्यायालयाच्या या भूमिकेचे नागरिकांकडून स्वागत होत आहे.

सुरेशकुमार मोहनलाल (वय 22, रा. मोरया हौसिंग सोसायटी, वेताळनगर, चिंचवड) असे सहा महिन्यांची शिक्षा लागलेल्या आरोपीचे नाव आहे. याबाबत पीडित महिलेने चिंचवड पोलीस ठाण्यात फिर्याद दिली आहे. सहायक आयुक्‍त डॉ. सागर कवडे यांनी दिलेल्या माहितीनुसार, 10 डिसेंबर रोजी दुपारच्या सुमारास पीडित महिला घरात एकटी असताना आरोपी तिथे आला आणि तिचा विनयभंग केला. पोलिसांनी गुन्हा दाखल केला.

 त्यानंतर आरोपीला अटक केली. तसेच दुसरीकडे तातडीने विनयभंगाच्या गुन्ह्यातील दोषारोपपत्र तयार केले. आरोपीला दोषारोपपत्रासह न्यायालयात हजर केले. सरकारच्या वतीने ऍड. साधना बोरकर यांनी युक्‍तीवाद केला. पोलिसांनीही पुराव्याची भक्‍कम भिंत उभी केली. अवघ्या 36 तासांमध्ये न्यायालयाने आरोपी सुरेशकुमार मोहनलाल याला विनयभंगाच्या गुन्ह्यात सहा महिन्यांची शिक्षा सुनावली. त्यानंतर पोलिसांनी आरोपीची रवानगी तुरूंगात केली आहे.