आनंदवार्ता । भामा-आसखेड प्रकल्पबाधितांसाठी आनंदाची बातमी; जमीनींचे ‘पुनर्वसनासाठी राखीव’ शेरे उठवणार

आढळराव पाटील म्हणाले की, खेड तालुक्यातील बाधित शेतकऱ्यांना महाराष्ट्रातील युती शासनाने भामा-आसखेड व सेझचे प्रलंबित विषय प्राधान्याने सोडवून आनंदाचे डबल गिफ्ट दिले आहे.

या भागाचा लोकप्रतिनिधी म्हणून शेतकऱ्यांसाठी जिव्हाळ्याच्या असलेल्या या दोन्ही महत्त्वाच्या प्रश्नांवर गेली अनेक वर्षे आपण शेतकऱ्यांसोबत लढा दिला. अनेक शेतकरी व शिवसैनिकांवर या विरोधातील आंदोलनातून गुन्हे दाखल झाले. भविष्यात शेतकऱ्यांवरील हे गुन्हे मागे घेण्यासाठी माझा शासनाकडे आग्रही पाठपुरावा राहणार आहे.

भामा आसखेड प्रकल्प बाधित शेतकऱ्यांच्या जमिनीवरील राखीव शिक्के शासनाने उठवावे यासाठी मुख्यमंत्री एकनाथ शिंदे यांच्याकडे माझा सातत्यपूर्ण पाठपुरावा सुरू होता. गेली वीस वर्षे प्रलंबित असलेला हा प्रश्न केवळ सहा-सात महिन्यात सुटल्याने मुख्यमंत्र्यांच्या कार्यशैलीची व शेतकऱ्यांप्रति असलेल्या प्रेमाची चुणूक दिसून येते. लवकरच बाधित शेतकऱ्यांच्या कोऱ्या झालेल्या सातबारांचे वाटप संबंधित शेतकऱ्यांना करून त्यांच्या आनंदात सहभागी होणार असल्याचे यावेळी माजी खासदार शिवाजीराव आढळराव पाटील यांनी सांगितले.

या निर्णयामुळे भामा-आसखेड लाभक्षेत्रबाधित खेड तालुक्यातील काळूस, वाकी खुर्द, आसखेड खुर्द, रोहकल, कोरेगाव, करंजविहीरे, शेलू, आंबेठाण, पिंपरी खुर्द, चाकण, बिरदवडी, मेदनकरवाडी, कडाचीवाडी, रासे, भोसे, शेलगाव, खराबवाडी, गोनवडी व नानेकरवाडी या गावांतील ९०८८ हेक्टर शेतजमिनींवरील पुनर्वसनासाठी राखीव शेरे उठविले जाणार आहेत.  खेड एसईझेड टप्पा दोन मधील पूर, चौधरवाडी, गोसासी, वाफगाव, पाबळ, रेडवडी, वरूडे या गावांतील २५७९ हेक्टर क्षेत्रावरील संपादनासाठी राखीव असल्याचे शिक्के काढण्यात आले असल्याची माहिती माजी खासदार शिवाजीराव आढळराव पाटील यांनी दिली.