शेतकऱ्यांनी कृषी प्रक्रिया उद्योगाकडे वळावे – केंद्रीय राज्यमंत्री प्रल्हादसिंग पटेल

सातारा (जिमाका) :  शेतकऱ्यांनी पिकवलेला फळे,  भाजीपाला हा काही कालमर्यादेपुरताच टिकून राहतो. काल मर्यादा संपल्यानंतर त्यांचा माल हा खराब होतो व त्यांचे मोठ्या प्रमाणात नुकसान होते. हे नुकसान टाळण्यासाठी शेतकऱ्यांनी कृषी प्रक्रिया उद्योगाकडे वळावे. यामुळे  शेतकऱ्यांना,  देशाला लाभ होईल,  असे प्रतिपादन जलशक्ती,  अन्न प्रक्रिया उद्योग केंद्रीय राज्यमंत्री प्रल्हादसिंग पटेल यांनी केले.

गुठाळवाडी ता. खंडाळा या गावातील जलजीवन मिशन व स्वच्छ भारत मिशनमधील विविध कामांची पहाणी आज केंद्रीय राज्यमंत्री पटेल यांनी केली. यावेळी खासदार श्रीनिवास पाटील,  जिल्हा परिषदेचे अध्यक्ष उदय कबुले,  मुख्य कार्यकारी अधिकारी विनय गौडा यांच्यासह विविध विभागांचे अधिकारी, ग्रामस्थ उपस्थित होते. पटेल म्हणाले,  भारतीय शेती मालाला जगात मोठी मागणी आहे, परंतु शेतकऱ्यांना बाजार पेठेची माहिती नाही शेतकऱ्यांचा प्रक्रिया केलेल्या शेती मालाला बाजार पेठ मिळविण्यासाठी प्रयत्न करणार आहे.

ज्यांना घर नाही अशांना घरे, शौचालय व आरोग्य या मुलभूत गरजा नागरिकांना प्राधान्याने मिळावे यासाठी केंद्र शासनाने भर दिला आहे. ज्या गावांमध्ये पाण्याच्या योजना आहेत त्याची वेळोवेळी देखभाल केली पाहिजे. तेथील पाण्याचे नमुने आठवड्याला तपासले पाहिजेत. यासाठी महिलांचा 50 टकके सहभाग घ्यावा व त्यांना प्रशिक्षण देण्यात यावे. भविष्यातील लोकसंख्येचा विचार करुन पाणी कमी पडणार नाही यासाठी आत्तापासून पाण्याचे नियोजन करावे, असेही त्यांनी यावेळी सांगितले.