ढोल-ताशा, लेझीमच्या तालावर सरेवाडीत पहिलीच्या विद्यार्थ्यांचे स्वागत
खेड : सरेवाडी येथे शाळापूर्व तयारी कार्यक्रमांतर्गत शाळा पूर्वतयारी मेळावा गुरुवारी (दि. २१) घेण्यात आला. इयत्ता पहिलीच्या विद्यार्थ्यांना ढोल-ताशा व लेझीम पथकाच्या साहाय्याने मिरवणुकीद्वारे विद्यार्थ्यांचे शाळेत आगमन करण्यात आले.
महाराष्ट्र शासन एम. सी. आर. टी पुणे, खेड पंचायत समिती व पुणे जिल्हा परिषद यांच्या वतीने झालेल्या या कार्यक्रमात विद्यार्थ्यांचे स्वागत करण्यात आले. यावेळी शालेय व्यवस्थापन समितीचे अध्यक्ष दत्तात्रय ठोकळ, निलेश ठोकळ, अंगणवाडी सेविका सुलाबाई ठोकळ, कुसूम ठोकळ (एकलव्य शिक्षिका), सचिन ठोकळ, सुंदराबाई ठोकळ व शालेय व्यवस्थापन समितीचे सदस्य, पालक व ग्रामस्थ उपस्थित होते.
नवीन विद्यार्थ्यांना शालेय आनंद मिळावा म्हणून ‘सेल्फी पॉइंट’चे आयोजन करण्यात आले होते. इयत्ता पहिलीच्या विद्यार्थ्यांना सेल्फी काढण्यात आनंद लुटला. प्राथमिक स्वरूपाची माहिती विद्यार्थ्यांकडून तपासून त्यांच्या शैक्षणिक अंगाच्या विकासाची पुस्तिका पालकांना स्वाधीन करण्यात आली. विद्यार्थ्यांना शालेय वातावरण आनंदी असावे. म्हणून शाळा पूर्व तयारी करून घेण्यात आली. कार्यक्रमानंतर विद्यार्थ्यांना केळी व अल्पोपहार देण्यात आला.
कार्यक्रमाचे मार्गदर्शक खेड पंचायत समितीचे गटशिक्षणाधिकारी जीवन कोकणे, नायफड केंद्राचे केंद्रप्रमुख भरत लोखंडे, व्यवस्थापक मुख्याध्यापक बापूराव दराडे होते. सूत्रसंचालन शिक्षक विजयकुमार शेटे यांनी केले.
