उपमुख्यमंत्री अजित पवार यांनी केली बारामती येथील विकासकामांची पाहणी

आय. एस. ओ. 9001-2015 आणि आय. एस. ओ. 28000-2007 प्रमाणपत्र वितरण

बारामती तालुक्यात 220 स्वस्त धान्य दुकाने कार्यरत आहेत. त्यापैकी 180 स्वस्त धान्य दुकाने, तहसिल कार्यालय आणि शासकीय धान्य गोदाम यांना आय. एस. ओ. 9001-2015 आणि आय. एस. ओ. 28000-2007 मानांकन प्राप्त झाले आहे.  आज विद्या प्रतिष्ठान येथे  उपमुख्यमंत्री अजित पवार यांच्या प्रातिनिधिक स्वरूपात 5 स्वस्त धान्य दुकानदारांना प्रमाणपत्राचे वितरण करण्यात आले.

तसेच या चांगल्या कामगिरीसाठी तहसिलदार विजय पाटील, पुरवठा निरीक्षण संजय स्वामी,  पुरवठा अव्वल कारकून प्रमिला लोखंडे यांना   पवार यांच्या हस्ते  प्रशस्तीपत्र वितरित करण्यात आले.

कारगिल युद्धात शहीद झालेले नामदेव गणपत गडदरे यांच्या पत्नी उषा गडदरे रा. गडदरवाडी यांना शासनातर्फे देण्यात आलेल्या 5 एकर जमिनीचा 7/12 उतारा  पवार यांच्या हस्ते उषा गडदरे याना प्रदान करण्यात आला.

दिव्यांगत्व प्रमाणपत्र आणि वैश्विक ओळखपत्र  वाटप

यशवंतराव चव्हाण प्रतिष्ठान आणि  शासकीय वैद्यकीय महाविद्यालय यांच्या संयुक्त विद्यमाने बारामती तालुक्यासह पुरंदर, दौंड आणि इंदापूर तालुक्यातील दिव्यांग व्यक्तींना स्वावलंबन या पोर्टलद्वारे ऑनलाईन दिव्यांगत्व प्रमाणपत्र आणि वैश्विक ओळखपत्र  वाटप कार्यक्रमाचे आज आयोजन करण्यात आले.  पवार यांनी प्रातिनिधिक स्वरूपात 8 दिव्यांगांना आज ऑनलाईन प्रमाणपत्राचे वितरण केले. यावेळी महाविद्यालयाचे अधिष्ठाता चंद्रकांत मस्के, पुणे जिल्हा सहकारी बँकेचे संचालक संभाजी होळकर, पौर्णिमा तावरे, अभ्यागत समितीचे सदस्य सचिन सातव, मिलिंद संगई आदी उपस्थित होते.

दिव्यांग व्यक्तींना सर्व प्रकारच्या सोयी सुविधा उपलब्ध करुन द्याव्यात, असे निर्देश  पवार यांनी दिले.