बैल, घाट, घोडी सज्ज घोडेस्वाराची प्रतीक्षा

बैलगाडा मालक तयारीत : शिरूर तालुक्यात बैलगाडा घाटाचे सुशोभीकरण सुरू

दरम्यान शर्यत पुन्हा सुरू व्हावी म्हणून माजी खासदार शिवाजीराव आढळराव पाटील यांनी देखील खासदार असताना शर्तीचे प्रयत्न केले.  न्यायालयात स्वखर्चाने वकील देऊन बाजू मांडण्याचा देखील प्रयत्न झाला.  शर्यती बंद असल्याने शेतकरी बैलगाडा मालक,  बैलगाडा शौकीन हवालदिल झाले होते.

२०१९ च्या लोकसभा निवडणुकीत दिलेल्या आश्‍वासनामुळे खासदार डॉ. अमोल कोल्हे यांच्याकडुन बैलगाडा मालक अपेक्षा करीत होते.  दरम्यान पहिल्याच संसद अधिवेशनात बैलगाडा विषय आग्रहाने मांडला.  त्यावेळी ग्रामीण अर्थव्यवस्थेला चालना देण्यासाठी परदेशी पर्यटकांसाठी आकर्षणाचा विषय होऊ शकतो.

यातूनच पर्यटन वाढीसाठी व रोजगाराच्या संधी निर्माण होतील अशी भूमिका मांडून केंद्रीय पशुसंवर्धनमंत्री गिरीराज सिंह यांची भेट,  पशुसंवर्धन खात्याचे सचिव ओ. पी. चौधरी यांच्या समवेत बैठक, केंद्रीय मंत्रिमंडळाच्या फेरबदलानंतर बैल हा प्राणी संरक्षित प्राण्याच्या यादीतून वगळण्यासाठी पशुसंवर्धन मंत्री परशोत्तम रुपाला यांची भेट या सर्व प्रक्रियेत डॉ. कोल्हे यांना विश्‍वास आला होता की बैलगाडा शर्यत पुन्हा सुरू होतील,  याची सगळी माहिती ओझर येथे बैठक घेऊन बैलगाडा मालकांना दिली.  मात्र त्यावेळी बैलगाडा मालक देखील आक्रमक झाले होते मात्र डॉ. कोल्हे हे बैलगाडा मालकांची समजूत काढण्यात यशस्वी झाले होते

सर्वोच्च न्यायालयात राज्य सरकारने सुनावणीसाठी अर्ज करण्याची मागणी सातत्याने डॉ. कोल्हे, पशुसंवर्धन मंत्री सुनील केदार यांच्याकडे करीत होते.  त्याचबरोबर माजी खासदार शिवाजीराव आढळराव पाटील यांचा देखील पाठपुरावा सुरू होता.  अखेर ही लढाई राज्य सरकारने जिंकली आणि बैलगाडा शर्यतीला हिरवा कंदील मिळाला त्यामुळे आता पहिल्या बारी पुढे खासदार डॉ. अमोल कोल्हे कधी घोडी धरणार याकडे सर्वांचे लक्ष लागले आहे.