समाजाने काय दिले यापेक्षा आपण समाजाला काय देऊ शकतो याचा विचार स्नातकांनी करावा – राज्यपाल भगत सिंह कोश्यारी

मुंबई : समाजाने आपल्याला काय दिले याचा विचार न करता आपण समाजाला काय देऊ शकतो याचा विचार स्नातकांनी करावा. स्नातकांनी सर्वप्रथम जीवनातील आपले ध्येय सुनिश्चित करावे व आई वडील व राष्ट्रसेवेचा संकल्प करावा. युवकांनी ठरविल्यास ते समाजात परिवर्तनदेखील घडवू शकतात, असे प्रतिपादन राज्यपाल तथा कुलपती भगत सिंह कोश्यारी यांनी आज येथे केले.

राज्यपाल  कोश्यारी यांच्या दूरस्थ उपस्थितीत आज संत गाडगेबाबा अमरावती विद्यापीठाचा अडतीसावा दीक्षान्त समारंभ संपन्न झाला, त्यावेळी राजभवन मुंबई येथून सहभागी होताना राज्यपाल  कोश्यारी बोलत होते.

आज जग संशोधन, नवसंशोधन, इन्क्युबेशनच्या युगात प्रवेश करीत आहे. हे संशोधन विज्ञान किंवा कृषी विज्ञान या क्षेत्रातच करता येते असे नाही तर ते इतिहास, मानव्यशास्त्र यांसह सर्व शाखेत करता येते. राष्ट्रीय शैक्षणिक धोरणामुळे आंतर शाखीय अध्ययन तसेच विज्ञानासोबत संगीत शिकण्याची देखील संधी उपलब्ध आहे. अशा वेळी विद्यार्थ्यांनी स्टार्ट अप, स्वयंरोजगार या माध्यमातून नवउद्यमी झाले पाहिजे.  केवळ नोकरी शोधणे हे लक्ष्य ठेवल्यास आत्मनिर्भरतेचे ध्येय गाठता येणार नाही, असे राज्यपालांनी सांगितले.

हरियाणा येथील एका गावात अमेरिकेतून उच्च शिक्षण घेऊन आलेली तरुणी सरपंच म्हणून कार्य करीत आहे असे सांगून स्नातकांनी पदवीनंतरदेखील आपले शिक्षण सुरु ठेवावे तसेच गावाच्या, राज्याच्या व देशाच्या विकासात योगदान द्यावे असे राज्यपालांनी सांगितले.